銀幸ginkgo 兩周年！

不經不覺，銀幸已經步入第2個年頭。兩位磨轆一樣咁轆，今年比上年多左更加多夠鳩既人入黎一齊做野，仲要比起以前更加鳩，銀幸開始比隔離左右懷疑呢到係瘋人院。兩位磨轆必需要澄清一點，90%既on9 story都唔係我地post，有睇開就會明白同事們有幾咁痴線⋯⋯

今年最大既轉變係銀幸開多左另一間公司 dipmad.co 黎去處理一切 Branding 相關工作，集中番業務。而銀幸就繼續處理一切婚禮相關紙品製作。

由成立到依加，銀幸一直希望同客人建立一個互信嘅關系，唔係單純「你要咩，我畀你」，而係喺規範下，加上銀幸，設計出一張「大家都開心」嘅作品。「大家都開心」個開心，係設計師可以發揮創意、客人覺得滿意。當中包含著滿足、信任，銀幸追求既就係依一種人與人之間相處嘅快樂。

呢年好多客人因為政府各種措拖底下，搞到婚期一係改完又改，一係就處於延期同照搞既兩難選擇題。引致左極多婚期緊迫既新人做 last minute fighter，為咗令新人可以快速地揀選心水設計同印刷，所以銀幸推出「Good to go」，客人只需要直接揀款再揀紙張、顏色、印刷技術，就可以製作。

感謝依段日子信任銀幸嘅所有朋友，未來嘅日子仲有好長，我哋會一步一步咁行好，一步一步咁向住目標前進。

#特別鳴謝圖中曾經和現在為銀幸付出過既各位
#攝於聖誕派對

小故事(一)：今年聖誕派對有交換禮物，但唔比出街買，一定要係屋企拎野番黎，有個痴線同事因為唔記得拎禮物番黎，拎左我隻襪加一舊水黎做抽獎。當眾人屌鳩佢唔係屋企拎野番黎，佢竟然答 “我當左公司係我屋企”。咁虛偽既說話，我真係好鍾意。（最後係我自己抽到佢份禮物，好想睇其他同事抽到既尖叫反應）

小故事(二)：有個好鍾意放屁既女同事，係每一次放屁之前都會大叫我想放屁呀！去屙完屎又會番黎大叫，大家千祈唔好入廁所。兩位磨轆同埋其他同事一直受到呢種嗅覺與精神既折磨。終於，有一日見到有曙光，就係有新既男同事番工⋯⋯女同事毅然提出 ”我一定唔會再講呢d說話！放屁都出去放，唔想嚇親人”，當我地以為會有數個月既平靜，奈何係男同事番工既第二個鐘，女同事就破戒，講我想放一個屁！（誠邀任何一個香薰/ 蠟燭品牌既冠名贊助！）